Keppnisreglugerð BSÍ

1. Almenn ákvæði.

1.1.Þátttökutilkynningar.

Á hverju hausti tilkynnir stjórn BSÍ aðildarsamböndum sínum þátttökurétt þeirra í Íslandsmótum næsta árs. Jafnframt tilkynnir stjórnin ákvörðun sína um keppnisgjöld, stað og tíma. Tímamörk til að senda þátttökutilkynningar, nöfn spilara, keppnisgjöld og fl. ákveður mótanefnd BSÍ, sé ekki kveðið sérstaklega á um annað í keppnisreglugerð. Vanræki svæðasamband að uppfylla þær kvaðir sem þeim eru sett í þessu efni, missa þau rétt sinn til þátttöku.


1.2. Alþjóðalög og áfrýjanir.

Íslandsmót, þ.e. svæðamót, undanúrslit og úrslit, skal spila samkvæmt alþjóðalögum í bridge og þeim íslensku reglum sem settar kunna að verða þeim til viðbótar. Öll svæðasambönd skulu skipa 3 manna dómnefnd sem hefur lögsögu innan síns svæðis um öll mál er varða túlkun á ofangreindum lögum og reglun. Úrskurði svæðisdómnefnda er hægt að áfrýja til dómnefndar BSÍ. Í undanúrslitum og úrslitakeppni er úrskurði keppnisstjóra áfrýjað beint til dómnefndar BSÍ. Mál sem varða óheiðarleika eða ósæmilega framkomu skal tafarlaust tilkynna stjórn BSÍ.


1.3. Mótstjórn.

Í hverri keppni skal samband það, sem keppni heldur, skipa sérstaka mótstjórn sem fer með þau réttindi og skyldur, sem slíkum aðila er ætluð í bridgelögum. Heimilt er í svæðismótum, að svæðisstjórn sé jafnframt mótstjórn.


2. Sveitakeppni.

2.1. Keppnisfyrirkomulag.

Íslandsmót í sveitakeppni er spilað í þremur áföngum: - undankeppni innan hvers svæðasambands - undanúrslitum og - úrslitum.


2.2. Undankeppni.

Undankeppni er að öllu leyti á vegum svæðasambandanna. Fjöldi spila í hverjum leik skal vera minnst 40 spil ef um hreina útsláttarkeppni er að ræða. Ef keppnisformið er annað, skal hver sveit spila a.m.k. 120 spil. Allir leikir reiknast í IMP-stigum og vinningsstigum. Verði sveitir jafnar að vinningsstigum í raðkeppni, telst sú sveit hærri, sem flest vinningsstig hefur úr innbyrðis leik/leikjum. Sé enn jafnt ræður heildarhlutfall IMP-stiga, en sé þá enn jafnt ræður hlutkesti. Séu sveitir jafnar í keppni með Monrad- fyrirkomulagi telst sú sveit hærri, sem spilað hefur við stigahærri sveitir, en sé enn jafnt ræður hlutkesti. Í útsláttarkeppni er aðeins reiknað í IMP-stigum, en séu sveitir jafnar að leik loknum er leikurinn framlengdur um 4 spil. Sé enn jafnt, ræður hlutkesti. Að öðru leyti ákveða svæðasambönd keppnisfyrirkomulag og setja reglur fyrir mótið. Keppnisreglugerð og upplýsingar um spilastað og tímasetningu skal senda BSÍ a.m.k. fjórum vikum fyrir mót.


2.3. Undanúrslit.

Í undanúrslitum spila 40 sveitir sem skipt er í 4 riðla.
Í hverjum riðli er spiluð raðkeppni, 20 spila leikir, án hálfleiks.
Þátttökuréttur í undanúrslitum ræðst af eftirfarandi:
1) 16 sæti deilast jafnt á milli svæðasambanda BSÍ
2) Íslandsmeistarar fyrra árs eiga rétt til þátttöku að því tilskyldu að 3/5 hlutar meistaranna skipi
sveitina. Að öðrum kosti færist réttur þeirra til viðkomandi svæðasambands. Þá eiga þau
svæðasambönd, sem áttu þær sveitir, sem skipuðu úrslitasæti 2-10 á fyrra ári, rétt á jafnmörgum
sveitum.
3) Þeim 14 sætum sem óráðstafað er skv. lið 1) og 2) skal skipt milli svæðasambanda í beinu hlutfalli
við fjölda félagsbundinna spilara á hverju svæði, sbr. grein 3.6 og 4.11 í lögum BSÍ. Varasveitum
er skipt eftir sömu reglu. Stjórn BSÍ er heimilt að beita viðurlögum sem hún telur hæfa við
úthlutun þessara sæta, liggi viðunandi upplýsingar um félagatölu ekki fyrir frá einstökum félögum.

Upplýsingar frá svæðasamböndum um þátttökusveitir verða að liggja fyrir ekki síðar en 2 vikum fyrir undanúrslit. Þegar svæðasamband tilnefnir þær sveitir sem spila á íslandsmóti, skal það jafnframt tilnefna eina varasveit sem gengur fyrir ef forföll verða innan svæðisins. Bregðist sú sveit einnig, ráðstafar BSÍ sætinu í samræmi við lið 3. Mótanefnd BSÍ hefur þó rétt til að skipa varasveitir verði öðru ekki komið við. Mótanefnd BSÍ raðar sveitum í 10 flokka eftir stigafjölda 4 stigahæstu manna hverrar sveitar samkvæmt nýjustu meistarastigaskrá, að viðbættum stigum síðustu 5 ára, þó að því tilskyldu að þeir hafi spilað a.m.k. ¼ hluta spila í undankeppni svæðasambands. Ein sveit úr hverjum styrkleikaflokki er dregin af handahófi í hvern riðil.

2.4. Úrslit.

Í úrslitum spila 12 sveitir, raðkeppni, 16 spila leiki, án hálfleiks. Spilað er með skermum nema mótsstjórn ákveði annað vegna framkvæmdar á sýningaleikjum. Að því loknu halda 4 efstu sveitirnar áfram og spila raðkeppni 16 spila leiki. Sú sveit sem flest stig hlýtur í öllum leikjum í úrslitunum telst sigurvegari. Verði sveitir jafnar þá ræður innbyrðis viðureign/ir, sé enn jafnt ræður heildarhlutfall IMP stiga, sé enn jafnt telst sú sveit hærri sem fleiri stig fær á móti tveim efstu sveitum (að þeim sjálfum frátöldum).

3. Tvímenningskeppni.

3.1. Keppnisfyrirkomulag.

Meistaramót í tvímenning spilast sem opin svæðamót og úrslit.

3.2. Svæðamót.
Svæðasamböndin halda undankeppnina. Undankeppnin er opin öllum spilurum innan sambandsins, svo lengi sem húsrúm leyfir og ræðst þá forgangsröð af skráningartíma. Spila skal a.m.k. 60 spil. Tvö eða fleiri svæði geta sameinað hjá sér mótin og leggst þá kvóti þeirra saman. Hverju pari er heimilt að kalla til 1 varamann í allt að þriðjungi keppninnar, án þess að réttur þess skerðist. Spili varamaður meira en þriðjung hefur hann um leið fengið réttindi þess spilara sem hann leysir af hólmi.


3.3. Úrslit

Rétt til að spila í úrslitum eiga þau pör sem enduðu í ¾ efsta hlutanum í svæðamótum auk þess sem 10 efstu pörin í úrslitum árið á undan eiga rétt á að spila í úrslitum. Heimilt er að spila um rétt í úrslitum í fleira en einu svæðamóti.
Í úrslitum er spilaður monrad barómeter og spilafjöldi fer eftir þátttöku . Ef 60 eða færri pör: 20 umferðir með 6 spil milli para. Ef 61-84 pör: 24 umferðir með 5 spil á milli para. Ef 85 eða fleiri pör: 30 umferðir með 4 spil milli para.

Hverju pari er heimilt að kveðja til varmann í allt að fjórðung keppninnar, án þess að réttur þess skerðist. Spili varamaður meira en fjórðung missir parið réttindi til verðlauna. Verði pör jöfn í svæðamótum ræður hlutkesti. Verði pör jöfn í lok móts ræður; a) samanburður þegar pör sitja í sömu átt, b) hlutkesti.

4. Bikarkeppni

4.1. Keppnisfyrirkomulag.

Bikarkeppni er útsláttarkeppni sveita og umferðafjöldi ræðst af heildar- þátttökufjölda sveita. Öllum sveitum er frjálst að taka þátt í þessari keppni, án tillits til búsetu. Spilarar mega vera 4-6 í hverri sveit. Í fyrstu umferð eru sveitir dregnar saman af handahófi. Sé fjöldi sveita ekki margfeldi af tveimur (2-4-8-16-32-64), er dregið í fyrstu umferð með það fyrir augum að ná fjöldanum niður í veldi af tveimur og lendir þá umframfjöldi sveita af handahófi í yfirsetu. Þó skulu sveitir með landsliðsspilara innanborðs hafa forgang til yfirsetu í 1. umferð, ef fjöldi yfirsetusveita leyfir. Fjöldi spila í hverjum leik skal vera 40, spiluð í fjórum 10 spila lotum. Heimasveit situr fast í fyrstu 20 spilunum, en útisveit fast í síðari 20 spilum. Spilafjöldi í undanúrslitum er 48, spiluð í fjórum 12 spila lotum. Spilafjöldi í úrslitaleiknum er 64, spiluð í fjórum 16 spila lotum. Spilað er um IMP-stig og sú sveit telst sigurvegari sem skorar fleiri IMP-stig. Séu sveitir jafnar að leik loknum, skal framlengja um 4 spil. Séu sveitir enn jafnar, skal spila bráðabana, eitt spil í senn, þar til úrslit fást.

4.2. Samningar um leikdag.

Mótanefnd dregur sveitir saman af handahófi í lok hverrar umferðar og skal drátturinn vera opinber og auglýstur með a.m.k. viku fyrirvara. Fyrirliði heimasveitar skal hafa samband við fyrirliða andstæðinga innan viku frá drætti til að semja um leikdag. Bregðist það getur fyrirliði útisveitar haft samband við skrifstofu BSÍ, til að leita liðsinnis við að ná í fyrirliða heimasveitarinnar. Fyrirliðar skulu hafa ákveðið leikdag í síðasta lagi viku fyrir lok spilafrests.


5. Gildisákvæði

Keppnisreglugerð þessi er sett á þingi Bridgesambands Íslands þann 19. október 2003 og falla jafnframt úr gildi allar fyrri reglugerðir